Ախտանշաններ

Լարվածության գլխացավի ժամանակ կարող եք ունենալ հետևյալ ախտանշանները.

• Բութ, գլուխը պարուրող ցավ

• Լարվածության և ձգվածության զգացողություն ճակատի, քուների կամ ծոծրակի շրջանում

• Գլխի, պարանոցի և ուսերի մկանների լարվածություն

Լարվածության գլխացավը դասակարգվում է 2 հիմնական ենթատեսակների՝ էպիզոդիկ և քրոնիկ։

Էպիզոդիկ լարվածության գլխացավ

Էպիզոդիկ լարվածության գլխացավը կարող է տևել 30 րոպեից մինչև 1 շաբաթ։ Ցավերը ամսական 15 օր և ավելի քիչ են, առնվազն 3 ամիս անընդմեջ։ Հաճախակի ցավերով էպիզոդիկ լարվածության գլխացավը կարող է վեր ածվել քրոնիկի։

Քրոնիկ լարվածության գլխացավ

Այս տիպի լարվածության գլխացավերը կարող են տևել ժամերից մինչև ամիսներ։ Եթե Ձեր գլխացավերը վերջին 3 ամսում ամսական 15 օր և ավելի են, ապա խոսքը գնում է քրոնիկ լարվածության գլխացավի մասին։

Լարվածության գլխացավ, թե միգրեն

Երբեմն դժվար է տարբերակել լարվածության գլխացավը միգրենից։ Բացի այդ, եթե դուք ունեք, օրինակ, հաճախակի էպիզոդիկ լարվածության գլխացավ, դուք կարող եք նաև միգրեն ունեալ։

Ի տարբերություն միգրենի, լարվածության գլխացավերը հիմնականում չեն ուղեկցվում տեսողական երևույթներով, սրտխառնոցով կամ փսխումով։ Ֆիզիկական ակտիվությունը սովորաբար ուժեղացնում է միգրենի գլխացավը, սակայն չի ուժեղացնում լարվածության գլխացավը։ Գերզգայունությունը լույսի և ձայների նկատմամբ կարող են լինել լարվածության գլխացավերի ժամանակ, սակայն բնորոշ չեն դրանց։

Երբ դիմել բժշկի

Դիմեք բժշկի եթե լարվածության գլխացավը անհանգստացում է ձեզ, ազդում է կյանքի որակի և աշխատունակության վրա, կամ եթե կարիք է լինում շաբաթական 2 և ավելի անգամ ցավազրկողներ կիրառել։

Եթե Ձեզ ախտորոշել են լարվածության գլխացավ, և դուք հսկողության տակ եք, սակայն գլխացավի բնույթը կտրուկ փոխվել է և այևս նման չէ Ձեր սովորական գրոհներին, ապա հարկավոր է դիմել մասնագետի, հնարավոր բարդություններից խուսափելու նպատակով։

Անհապաղ դիմեք ձեր բժշկին կամ շտապ օգնություն, եթե Դուք զգում եք հետևյալ ախտանշաններից և նշաններից որևէ մեկը։ Դրանք կարող են ավելի լուրջ հիվանդության հետևանք լինել։

• Ամպրոպի հարվածի նման կտրուկ գլխացավ

• Գլխացավ, որը ուղեկցվում է ջերմությամբ, պարանոցի մկանների կարկամությամբ, շփոթվածությամբ, ցնցումներով, երկտեսությամբ, մարմնի որևէ հատվածի թուլությամբ և թմրածությամբ

• Գլխացավ գլխի վնասվածքից հետո

•  Քրոնիկ գլխացավ, որը սաստկանում է հազից, մարզվելուց, ճիգ գործադրելուց կամ կտրուկ շարժումներից

• 50 տարեկանից հետո առաջին անգամ սկսված նոր գլխացավ

Ունե՞ք հարցեր

Ուղղեք Ձեր հարցը բժշկին